Puur Plat

Naam: Raf Gielen en Jeaneau Thoma
Leeftijd: 14 en 15 jaar
Woonplaats: Puth / Schinnen
Naam act: Puur Plat
Naam liedje: Murge is van os
Facebook: Puur Plat

Raf Gielen (14 jaar) en Jeaneau Thoma (15 jaar) vurme same ‘t duo Puur Plat! Dees twee enthousiaste carnavalsvierders oet Pöt en Sjènne sjtoan net es veurig joar in de finale van het TVK.

Vasteloavendvierders in Hart en Zeel

’t Duo is ontsjtange noadat ze in 2014 allebei jeugprins woare: Jeaneau bie de Schinöster en Raf bie de Pötters. Ze regeerde allebei es zèngende Prinse mit eeder hun eige vasteloavesleedje. Noa dae biezunjere vasteloavend besjloate ze om hun sjtumme biejein te voege en inmiddels höbbe ze alweer veer leedjes op hun repertwoar stoan.

Raf Gielen en Jeaneau Thoma

Eine echte laevensgeneeter is Jeaneau! Hae is opgegreuid in ein restaurant en doa heurt good aete en gezelligheid bie. Neet veur niks zit hae op de Hotelsjool in Hasselt. Raf zit alweer in de derde klas op ‘t Graaf Huyn College in Gelaen. Hae besjteed ziene vrieje tied ’t leefste aan toneel bie ’t Laagland in Zitterd en voetballe bie de C2 van Alfa Sjport. En komme dees twee jonges urreges same, dan sjteit dat garant veur gezelligheid en een gooie sfeer!

Murge is van os

Hun leedje van dit joar is ein pittig vasteloavesleedje mit aug veur de jeugd én veur de vasteloavend. Mit ‘Murge is van os’ roope ze de jeugd op om het heft in eige handj te numme en zich te loate heure en zeker neet aan de kantj te blieve sjtoan want .... ´De toekomst is van os! Auch al verangerd alles om os heen, vasteloavend zal altied blieve en es `t aan Puur Plat ligt wurd dae allein mer sjoaner!

Pelgrimstoch noa ´t TVK

En geer höb ’t kenne heure in de vlog ... Puur Plat geit dit joar te voot noa de finale van ’t TVK in de Hanehof! Mer ondanks alle bloare geit `t daak d`r zeker weer aaf in Gelaen! Veer goan d’r ein prachtig fees van make in de Hanehof!

Dit artikel is geschreven door Puur Plat.